KALIBO, Aklan–Bangud sa ginamit nga substandard nga electrical extension nga ginsaksakan it refrigerator rason nga nasunog ro sangka sari-sari store sa Brgy. Ibao, Lezo.
Raya suno kay FO2 William Enriquez it Numancia Bureau of Fire Protection ukon BFP ro nagguwa sa andang ginpatigayon nga imbestigasyon kasunod it nag-eontad nga sunog nga tumupok sa mga baligya nga groceries ag iba pa nga ginapanag-iyahan ni Aladin Dela Rosa, sa legal nga edad ag residente man it nasambit nga lugar.
Ginpaathag nga uwa nakadaea ro extension sa load it mismong ginsaksak nga apliance rason nga eomopok raya nga nagtuga it kaeayo.
Una kara, pag-abot nanda sa lugar hay nagakaeayo pa ro baraka rason nga gilayon sandang nagpatigayon it fire fighting operation apang maabo eon ro nasunog sa mga baligya sa sueod.
Ginatantya nga kapin sa P48,000 ro kabilugang danyos it nasambit nga insidente.
May kaangtanan kara, nagpadumdom si FO2 Enriquez sa publiko nga likawan nga gumamit it mga substandard nga electrical extension ukon wiring eabi eon kon pagasaksakan it mga heavy load nga appliances.
