KALIBO, Aklan—Emosyunal nga nagapanawagan ro sangka tag-ana it sari-sari store sa mga responsabli nga nagpanakaw sa anang mga baligya nga pinakete nga sigarilyo nga ibalik ro mga raya maskin nga bukon eon it kompleto.
Suno kay Neonalyn Dadivas, 45-anyos, tag-ana it baraka nga mabahoe nga kalugihan kana ro natabu nga panakawan.
Ro insidente hay nag-eontad bandang ala-1:30 kaina it aga-aga sa kasagsagan it pagbunok it uean sa Brgy. Pook, Kalibo.
Ginatantiya nga P40,000 pesos ro kabilugan nga natakaw nga ginaeakipan it P10,000 pesos nga cash ag haeos P30,000 pesos nga balor it pinakete nga nagkaeain-eain nga klase it sigarilyo nga bag-o eamang nga gin-deliver.
Suno pa kana nga natiempo man nga nalipatan nanda nga boe-on ro kwarta nga kita nanda sa bilog nga adlaw kahapon sa andang kaha.
Ginapatihan nga ro mga suspek hay nag-agi sa kisame pasueod sa baraka ag nagguwa sa andang pwertahan.
Natukiban ro insidente sa pagbugtaw it andang unga bandang alas-4:30 it aga-aga nga bukas eon ro pwertahan ag owa ro mga baligya nga sigarilyo ag kwarta.
Nagaeaum ro biktima nga pinaagi sa CCTV footage it andang kaeapit baeay hay matumod ro mga suspek.
Nasayuran nga antes ro insidente hay sangka baraka man ro gintakawan maeapit sa nasambit nga lugar kun sa siin ginasugid nga ro suspek hay maniwang nga eaeaki nga nakasakay sa bisikleta ag naka-jacket.
Modus kara ro pagpanakaw it sigarilyo ag kwarta.
Sa makaron hay nagapadayun ro imbestigasyon it Kalibo PNP.
