KALIBO, Aklan—Kasunod sa pagsueod it tiempo it tig-ueu-ean, sangka resolusyon ro gindihon sa sangguniang bayan it Kalibo agud nga malimpyuhan ro mga drainage ag kanae agud nga malikawan ro mga pagbaha.
Suno kay Kalibo SB member Augusto Tolentino nga naga-grabe ro pagbaha bangud sa mga baradong drainages ag mga kanae nga owa naga-ilig ro tubi.
Bangud kara, ginhinyu nana kay mayor Juris Sucro ag sa Department of Public Works and Highways ukon DPWH nga panipuslan ro nabilin nga mga inadlaw para sa para sa de-clogging it mga imburnal, rehabilitasyon ukon repair it mga floodways ukon gina-iligan it mga tubi-baha ag paghakot sa mga basura sa kanae.
Kaeabanan suno kana nga may nailistang mga pagbaha kada mabaskog ro uean sa may parte it Veterans Avenue, Archbishop Reyes St., Goding Ramos ag L. Barrios St., Kalibo.
Dugang pa ni Tolentino nga kinahangean nga madali-on it DPWH ro pag-ayos it mga kanae para mabawasan ro pagbaha sa barangay Poblacion.
Nagaeaum imaw nga maaksyunan eagi ni mayor Sucro nasambit nga resolusyon.
