Sangka mag-asawa nga sakay it baroto sa kaeawran nga sakop it British Columbia ro nakibot matapos nga ro andag maisot nga saeakyang pangdagat hay haeos nagkueob kat pilit nga magsakay ro sangka sea lion agud nga makatakas sa naga-atake kana nga killer whales.
Suno kanday Ernest ag Viesia Godek nga ginpatay kanda ro makina it andang baroto kat maispatan ro tatlong killer whales maeapit sa andang baroto samtang nga nagapangisda sa Pedder Bay, maeapit sa Victoria.
Kasunod kara, nabatyagan it mag-asawa ro matsa pagbug-at sa likod nga parte it andang baroto.
Sa andang paglingot hay nakita ro sangka sea lion nga pilit nga nagasakay kara agud nga paeagiwan ro naga-eagas nga killer whales.
Uman nga nagbalik ro balanse it baroto kat nag-eumpat it uman ro sea lion sa tubi.
Apang padayun ro pagsunod-sunod kanda it sea lion hasta nga nakadungka ro andang baroto.
Ro mga litrato ag video it nasambit nga encounter hay naboe-an it mga pasahero nga nakasakay sa ibang baroto.
Ginaboebanta nga ro sea lion hay nagatimbang it 700 hasta 800 pounds.
