KALIBO, Aklan–Pursigido nga magpasaka it kaso ro sangka seafarer matapos nga ma-scam it sangka persona nga nagpakilaeang ahente it gasolinahan.
Ginpahayag it tagreklamo nga si Valentine Sision nga nakilaea nana si Cherrel Tapican, residente it Brgy. Badiangan, Banga ko nagtaliwan nga dag-on matapos raya nga ipakilaea kana it anang paryente.
Plano kunta it tagreklamo nga magtukod it sangka gasolinahan sa bahin it Brgy. Pampango, Libacao rason nga nagkumpiyansa imaw kay Tapican.
Samtang ginaproseso pa eamang sigon ro pilang dokumento hay nagtao eon sanda it P50,000 bilang down payment ag dugang nga P5,000 ag P3,500 mag-euwas pa raya sa P170,000 nanda nga down payment para sa ginabakae nga window machine.
Apang, makataliwan sigon ro haeos sang dag-on hay owa gihapon it maitao nga makinarya ro suspek rason nga nagdisidir sanda nga magreklamo sa barangay ag magpangayo it bulig sa mga otoridad.
Nauna eon sigon nga nagpromisa si Tapican nga igabalik eon lang kwarta nga anang nabuoe apang owa man natuman.
Owa eon man sigon raya nagasabat kung kontakon sa anang cellphone.
Sa kabilugan, naga-abot sa P228,500 ro balor it kwarta nga nabuoe sa tagreklamo.
Samtang, base sigon sa pag-usisa nanda sa lugar it suspek natukiban nga maabu eon raya nga nabiktima ag reklamo nga ginpaabot sa andang barangay.
Gin-engganyo man it tagreklamo ro iba pang indibidwal nga nabiktima it suspek nga makipagbueoligan sa pagpasaka it kaso agud nga mapundo eon ro saea kara nga hilimuon.
