KALIBO, Aklan—Uwa eon it kabuhi nga nasapwan ro sangka senior citizen sa suba nga sakop it Brgy. Laguinbanua, Ibajay.
Ginkilaea ni Punong Brgy. Arman Sevillano nga anang constituent ro biktima nga si Alicia Solidum Supe, nagapang edaron it 70 anyos ag residente it Brgy. Bagacay sa nasambit nga banwa.
Una kara, nakabaton sigon imaw it tawag maghalin sa punong barangay it Brgy. Laguinbanua nga may nasapwan nga ginang sa andang suba nga patay eon rason nga insigida raya nga gin-adtunan it barangay council ag ginkilaea ro biktima ag dikato nakumpirma nga inanod raya maghalin sa Brgy. Bagacay paadto sa suba it nasambit man nga barangay.
Ginpahayag dugang ni Sevillano nga may problema sa paino-ino ro biktima kon siin posible nga nag-adto raya sa suba ag uwa nataeopangdan it anang pamilya bangud nga nagsimba ro anang mga apo.
Posibleng nakaadto sa madaeom nag porsyon it suba si Supe ag naeomos hasta nga inanod raya hasta sa Brgy. Laguinbanua.
Uwa suno kana it foulplay ro nasambit nga insidente bangud nga uwa man it nakit-an nga lastro sa eawas it biktima.
May kaangtanan kara, ginlaygayan ni Sevillano ro mga nagaadto sa andang suba nga magdahan ag likawan ro mga madaeom nga porsyon it suba.
