KALIBO, Aklan—Sambilog pang senior citizen halin sa banwa it New Washington ro nagdangop sa Bombo Radyo Kalibo agud nga i-reklamo ro andang Municipal Social Welfare and Development Office ukon MSWDO bangud sa pagiging bungoe sigon sa andang mga reklamo angot sa social pension halin sa Department of Social Welfare and Development (DSWD).
Suno sa tagreklamo nga si Mr. Jose Matutina, 84 anyos it Brgy. Cawayan sa nasambit nga banwa nga bukon imaw it kumbinsido sa explinasyon kanda it andang MSWDO officer bangud nga ginaturo sanda sa regional office it DSWD para sa anuman nga pangutana.
Indi sigon nana masayuran kon ham-an nga ginkakas imaw kaibahan ro anang 82 anyos nga misis sa listahan it mga makabaton it social pension.
Suno kana nga umpisa nga ginpatigayon ro validation kanda ko nagtaliwan nga dag-on hay owa eon naeakip ro andang pangaean sa social pension pay-roll.
Nangawa sigon imaw bangud nga owa man sanda nagabaton it pension halin sa Social Security System ukon SSS.
Aminado man si Mr. Matutina nga konkreto ag maayos ro anang baeay, apang raya hay bangud sa anang hugod kat mabaskog pa ro anang eawas.
Sa pihak nga parte, nagpamalibad man nga magtau it anuman nga pahayag sa Bombo Radyo ro MSWDO officer bangud nga ro regional office sigon ro may hurisdiksyon kara.
