Kalibo Aklan——-Sangka senior citizen ro nagdangop sa Bombo Radyo Kalibo agud nga ireklamo ro andang Municipal Social Welfare and Development Office (MSWDO) matapos nga gina-alegar nga owa gin-eakip ro anang pangaean sa makabaton it 500 pesos nga kada buean nga pension ukon 6,000 pesos sa sueod it sang dag-on nga pension.
Suno sa 61 anyos nga tagreklamo nga si Mrs. Editha Pastrana it Brgy. Ochando New Washington nga ginhambaeon sigon imaw it andang MSWDO Officer nga si Mr. Efraim Taladtad nga bukon imaw it kwalipikado bangud nga negosyante ro anang mister ukon meat vendor sa Kalibo public market.
Nangawa sigon imaw bangud nga ro anang mister hay benepisyaryo it pension kato pang 2017.
Suno kana nga gusto nana nga masayuran kon paalin nga maka-avait it programang ‘Social Pension Program for Indigent Senior Citizens ukon SPISC bangud nga mabahoe nga bulig sigon sa anang kinahangeanon ro nasambit nga pension eabi eon ro pangbakae it anang maintenance nga bueong.
Nagpanindugan ro ginang nga may kinamatarung imaw sa nasambit nga pension bangud nga ro ginakita it anang mister hay bukon man it bastante.
Gindugang pa kara nga owa man imaw nagabaton it anuman nga pensiyon halin sa gobyerno ukon personal institution kapareho it GSIS ag SSS.
