KALIBO, Aklan—Nagpaabot it reklamo sa Bombo Radyo Kalibo ro sangka senior citizen matapos nga gin-aresto sigon ro anang gumankon nga uwa it demanda sa Brgy. Dalipdip, Altavas.
Suno sa tagreklamo nga si Samuel Sancho, gindakop sigon it pulis ro anang gumankon nga si Annie Saballero ko adlaw it Huwebes sa kasong disobedient nga ginpasaka ni Punong Brgy. Edilberto Domingo apang uwa sigon it warrant of arrest nga ginapakita.
Nag-ugat sigon ro isyu sa ginpangtapas nga saging hasta nga naabot sa pagsunog it kurae nga ginreklamo man it anang gumankon.
Ro naghimo sigon kara hay ro ginasugid nga tawuhan it kapitan nga imaw ro presenteng nagadumaea sa ginaagawan nga eogta.
Ko ulihi sigon hay ginbaliskad nanda ro istorya hasta nga anang gumankon ro napasakaan it kaso samtang ginahusay sa opisina it kapitan ro magtimbang nga parte.
Samtang sa pihak nga parte, ginklaro ni Punong Brgy. Domingo nga mismong si Saballero ro nagtresspassing sa panimaeay ni Jerry Francisco kon sa siin ginpangtapas nana ro mga kasagingan ag ginpanghawanan ro banawang ni Francisco.
Ginpahayag dugang ni Domingo nga samtang ginahusay nana ro magtimbang nga parte hay imaw pa sigon ro ginpasipaeahan it maeain ni Saballero.
Mag-eowas kara, nag-alsa boses pa si Saballero sa atubang it anang mga bisita rason nga ginpasakaan nana raya it kaso agud nga mataw-an it leksyon.
