KALIBO, Aklan—Ginpaidaeun makarun sa Enhanced Granular lockdown ro Sitio Tunga Barangay Ibao, Lezo.
Suno kay Barangay Kagawad Emelda Abalos it Barangay Ibao Lezo nga nagpagguwa eun it Executive order si Mayor Mary Lenette R. Fernandez it banwa it Lezo angot sa pagpatuman it lockdown sa nasambitan lugar.// may kaangtanan kara, kapin man sa 140 ka mga panimaeay ro apektado makarun it lockdown.
Raya hay matapos makalista it ap-at ka mga kaso it COVID-19 maghalin sa sangka pamilya nga ro andang ama hay nagatrabaho sa Kalibo International Airport ag nauna eun nga nagpositibo sa makamaeatay nga sakit.
Sa makarun hay owa eun it pwedeng magguwa sa andang tagsa ka panimaeay mag-eowas sa mga APOR, health workers, katapo it redcross, office personnel, ag iba pang indibidwal nga gintaw-an it pahatnugot sandig sa EO nga ginpaguwa it andang alkalde.
Samtang, ginpaeawig man ro ginapatuman nga curfew hours sa bilog nga barangay Ibao sa banwa it Lezo nga maga-umpisa alas 6:00 sa hapon hasta alas 6:00 it agahon.
Samtang, ginpaidaeum man sa enhanced granular lockdown ro pilang portion it Brgy. Aliputos, Numancia sa Aklan.
Nagsanib pwersa sa pagdeklara it nasambitang lockdown si Mayor Mary Lenette R. Fernandez it banwa it Lezo ag Mayor Jeserel T. Templonuevo it banwa it Numancia matapos magkalista it mga kaso it COVID-19.
Bangud kara, ro Lezo ag Numancia Municipal Police Stations personnel ro gintaeana nga magbantay sa lugar kaibahan ro mga Barangay Officials, Barangay Tanod it Ibao ag Aliputos para hugot nga mabantayan ro seguridad it mga residente.
