Ginpadayon sa gihapon ni Japanese Prime Minister Fumio Kishida ro pagpangampanya kara para sa anang kapartido para sa local election sa House of Representatives sa Wakayama No.1 district. sa pihak it pag evacuate kara bangud sa nag-eontad nga “smoke bomb” blast.
Suno kay Bombo International Correspondent Josel Palma nga base sa sangka video nga ginpakigbahin sa social media it sangka broadcaster nga makit-an ro pagtieipon it mga nagasuporta kay Prime Minister Kishida ag ginahueat ro igapatigayon karang diskurso sa nasambit nga lugar.
Pilang segundo eamang sigon ro nakataliwan hay may nabatian nga pagsabog ag napuno it asu ro lugar.
Ginapatihan nga ro “smoke bomb” hay gin-eapog nga sangka cylindrical silver object.
Angot kara, inisigida man nga naaresto ro suspek bangud sa suspicion of forcible obstruction of business ag temporaryong ginkustodiya sa Wakayama West police station para sa nagakaigong pagkuwesityon.
Ginaturo nga sangka 24-anyos nga eaeaki maghalin sa Hyogo region ro suspek.
Raya hay nakasuksok it saeamin, mask ag gray rucksack nga nagpakigtipon man sa mga tawo para mapamatian ro speech ni Kishida antes himuon ro nasambit nga insidente.
Sa makaron, nagapadayon pa ro imbestigasyon it mga otoridad para matumod ro motibo it nag-eontad nga pagpasabog.
Kung madumduman, owa pa it sang dag-on ro nakataliwan matapos ro pagpatay kay dating Prime Minister Shinzo Abe nga nagtuga it kahadlok sa nasyon ag naging rason it mas hugot nga seguridad para sa mga public officials
