KALIBO, Aklan—Ginakabaeak-an makaron it mga pumueoyo ro pag-collapse it sangka span it revetment wall sa bahin it Brgy. Jumarap, Banga.
Suno kay Punong Barangay Teodorico Teodosio it nasambit nga lugar nga mabuhay eon nga problema ro pagkatimpa it eugta sa kilid it Aklan river nga sakop it andang barangay.
Posible sigon nga mag-eapad pa ro kasamaran sa revetment wall bangud amat-amat eon nga naga-agi ro tubi sa likod kara.
Ginpahayag pa ni Teodosio nga nag-adto eon sanda sa taeatapan it Department of Public Works and Highways (DPWH)-Aklan ko nagtaliwan nga dominggo kung siin gin-rekomenda nga maghimo sanda it sangka resolution para sa pag-repair.
Apang, owa nanda ginaeauman nga eubusang maguba ro sangka span it revetment wall ko Lunes it gabi-i.
Nasayuran nga ginatinguhaan eon it taeatapan nga maeagas para sa 2022 budget ro P80 million nga pondo para madiretso ro konstruksyon it revetment wall hasta sa Brgy. Palale, Banga.
