KALIBO, AKLAN — Binawian eon it hueam nga kinabuhi ro sangka special child samtang gina bueong sa provincial hospital matapos nga masapwan nga nakagapos ro mga alima ag nagapaligos sa anang kaugalingon nga dugo ag tadtad it mga gaob ag nina ro ueo ag nagkaeain-eain nga parte it eawas sa sangka buho nga pieilakan it basura sa Brgy. Bakhaw Norte, Kalibo.
Ro biktima hay nakilaea kay Ronald Graho, 28 anyos ag residente man it nasambit nga lugar.
Suno kay Mr. Tani Bautista, tag-ana it baeay nga gina-ulian it biktima nga owa sigon it orasan kon magpanaw ag mag-uli si Ronald sa andang baeay.
Maskin sigon nga special child ro biktima hay masaligan nana raya sa anang mga ginasugo.
Ginpamalibaran man ni Bautista nga may nabatian sanda nga komosyon maeapit sa ginpilakan sa biktima.
Nasayuran nga nasapwan raya nga owa eon it eambong ag ro anang t-shirt mismo ro gingapos kana.
Mabahoe man ro anang pagpati nga bukon eamang it sangka tawo ro naghimo sa krimen.
Nasayuran nga mismong patrol it Bombo Radyo ro nagdaea sa biktima sa provincial hospital.
Sa pihak nga parte, ginpahayag ni Rodel Graho, tatay it biktima nga posibleng na-tripingan ro anang kamagueangan nga unga.
Ginpahayag dugang nga daywang beses eon raya nga nabakuean it owa nakilaea nga mga persona.
Blangko sigon sanda kon sin-o ro mga suspek.
