KALIBO, Aklan–Nag-abot sa ikaywang alarma ro nag-eontad nga sunog pasado alas-11 kaina it agahon sa sangka luma nga baeay sa Oyo Torong ibabaw sa banwa it Kalibo.
Gin-ugdaw it kaeayo ro nasambit nga old house nga himo tanan sa light materials ag sa ubos hay mga ginapa-rentahan nga stalls.
Nasunog ro haeos tanan nga mga gamit it baeay nga ginapanag-iyahan it pamilya malapit kaibahan ro kagamitan it andang mga tenant kapareho it parlor , computer shop, dental , optical , derma clinic , bakery ag iba pa.
Ginasugid nga ro kaeayo hay naghalin sa pwesto ni Dr Arthur Malapit.
Nabudlayan ro mga bombero nga tapnaon ro kaeayo sa pihak it pag-uean nga naexperiensiyahan tuga it bagyong agaton bangud nga haeos himo raya sa tapi ukon kahoy.
Ginasugid nga ro nasambit nga old house hay ginaboebanta nga naga-edad eon it 50 hasta 60 anyos.
Samtang, ginpahayag ni FO3 Alvin Patricio, tagapaghambae it Bureau of Fire Protection ukon BFP-aklan nga bandang alas-12:25 it hapon hay gindeklarang under control ro kaeayo.
Nagresponde sa insidente ro mga bombero halin sa Kalibo International Airport, Kalibo, Malinao, Banga, Makato ag New Washington.
Sangka bombero nga nakilaea kay FO1 casamayor it BFP kalibo ro naninahan matapos nga tamaan it nahueog nga yero.
Mag-eowas kara, owa man it nailistang naninahan sa mga sibilyan.
Naging madahan man ro mga katapo it BFP sa ginpatigayon nga mopping operation para sa andang kaeowasan sa posibilidad nga mahugos ro mga nasunog nga kahoy.
Ginatumod pa ro matuod nga ginhalinan it sunog ag danyos nga gintuga it insidente.
