KALIBO, Aklan–Owa it pagduha-duha nga ginturn-over it sangka honest Aklanon nga si Mrs. Aida Solano it Brgy. Calimbajan, Makato sa Broadcast Center it Bombo Radyo Kalibo ro sangka kahita nga may sueod nga kapin sa P11,500 nga balor it kwarta ag pila ka mga ID.
Sa pag-istorya it ginang, nakit-an kara ro kahita nga ginapanag-iyahan ni Katrina Ibunes it Brgy. Manhanip, Malinao sa Oyo Torong Terminal maeapit sa paradahan it mga jeep paadto it Nabas.
Nagdiretso anay sigon imaw sa anang mga transaksyon antes nga nagdangop sa estasyon it Bombo Radyo Kalibo para i-turnover ro kahita.
Dugang pa kara nga owa imaw it plano nga interesan ro kwartang nakita bangud nagapati imaw nga mas mabahoe pang grasya ro maga-abot kana pinaagi sa paghimo it tama.
May kaangtanan kara, eubos man ro kalipay nga nabatyagan ag pagpasaeamat it tag-ana it kahita nga si Katrina Ibunes.
Suno kana, ro nasambit nga kantidad hay halin pa sa anang nabaton nga bunos ag tipon.
Plano sigon kara nga gamiton ro kwarta sa pagbakae it pilang ka mga materyales sa pagpa-ubra it andang baeay ag pamasahe pabalik sa anang trabaho sa isla it Boracay.
Napan-uhan sigon nana nga owa eon ro anang wallet nga nakasukbit sa buesa matapos kara nga mag-banyo.
Nagbalik pa sigon sanda sa establisyemento kung siin imaw ulihing nag-adto kamana man nga magapa-blotter kunta sa Kalibo Municipal Police Station ag nagpanawagan sa Bombo Radyo Kalibo.
