KALIBO, Aklan — Nagtanyag it libreng sakay ro Kalibo United Tricycle Operators and Drivers Association adlaw it Miyerkules, Agosto 7.
Suno kay Genly Bentosa, presidente it nasambit nga asosasyon nga raya hay angot sa pagbalik eskwela it mga estudyante.
Apang bukon eamang sigon it exclusive sa mga estudyante ro andang libreng sakay kundi sa iba pang mga pasahero.
Ro nasambit nga serbisyo hay bilang pagpasaeamat sigon nanda sa mga commuter nga nagtau kanda it daean agud nga mapatapos ro andang mga inunga sa andang pagtuon.
Imbes nga alas-8:00 it agahon hay nag-umpisa ro andang libreng sakay bandang alas-7:00 it agahon nga nagbuhay hasta alas-12:00 it udtro adlaw kun sa siin ro andang starting point hay sa Capitol Site, Kalibo.
Kaeabanan sigon sa andang mga miyembro hay may biyaheng Brgy. Poblacion samtang ro iba pa hay may biyaheng Estancia, Caano ag Nalook.
Ginpahayag pa ni Bentosa nga raya eon ro ikaywang kahigayunan nga nag-offer sanda it libreng sakay .
Nasayuran nga ro andang asosasyon hay haeos tatlong dag-on pa eamang nga gintukod matapos nga magdesisyon nga magbueag sa dating TODA nga andang ginapasakupan.
