KALIBO, Aklan—Nagapati ro transgender nga si Asia Adriana Ybarra nga bukon man it importante ro kasae sa sangka relasyon.
Reaksyon raya ni Asia matapos ro naging pahayag ni Pope Francis sa sangka pakikipag-angot may kaangtanan sa same-sex marriage.
Suno kana, ro pagpalangga, commitment ag responsibilidad sa kada isaea ro nagapapag-on ag nagapabuhay sa relasyon.
Bilang sambilog sa miyembro it LGBTQ community ginarespito man sigon nana ro kasae bangud raya hay sagrado.
Gin-aku man kara nga may anang karelasyon makarun kung siin waeong dag-on eon sandang naga-iba sa sangka bubong apang owa sanda nakasae.
Ro kinahang-ean eamang sigon ni Asia hay sangka tawo nga makaibahan nana sa anang bilog nga kabuhi.
Samtang, sa pihak nga parte, nagpanindugan man si Fr. Tudd Beladres, koraparoko it St. John the Baptist Cathedral nga ro marriage o ukon kasae hay ekslubsibo eamang sa babaye ag eaeaki.
Suno kana, maskin san-o hay owa ginapasugtan it Simbahang Katolika ro same-sex marriage ukon pagpakasae it parehong eaeaki ukon parehong babaye.
Ro naging pahayag sigon ni Pope Francis kaangot sa pagsugot sa same-sex civil union hay bukon it official stand ukon doktrina it Simbahang Katolika.
Bukon man sigon raya it proklamasyon halin sa Santo Papa ukon it Vatican bangud raya hay opinion eamang nana sa sangka pakikipag-angot.
Apang, kinahang-ean man sigon natun nga taw-an it oportunidad ukon tyempo si Pope Francis nga klarohon ro anang naging pahayag.
