BALITANG Espesyal — Kilaea ro tribong Mundari halin sa South Sudan sa East Africa bilang “Cow Tribe” bangud nga mabahoe nga parte ro mga baka sa andang pagpangabuhi.
Mag-eowas sa naga-istar ro tribo kaibahan ro libu-libong baka, ginagamit man nanda ro mga raya para sa pagkaon, negosyo, dowry, ag iba pa.
Apang bukon eamang it raya it pueos it mga baka para kanda bangud nga ginagamit man nanda ro anang ihi bilang shower ukon pampaligos!
Kapareho it maabu nga mga tribo sa rehiyon, simbolo it manggad ag gahum ro mga baka para sa mga Mundari.
Apang raya man ro kaeabanan nga ginahalinan it banggi-anay sa andang lugar.
Sa kamatuoran, nagagamit pa sanda it baril agud eamang nga protektahan ro andang mga baka halin sa mga manakaw.
Ginagamit man it mga Mundari ro ihi it baka bilang panghugas sa andang uyahon ag maskin sa andang mga ngipon bangud nga nagapati sanda nga raya hay antiseptic ukon panglimpyo.
Nakakabulig man ro uric acid nga makit-an ihi nga nagatau kanda it kulay puea, orange, ukon dueaw nga buhok nga para kanda hay manami.
Mag-eowas sa ihi, ginagamit nanda ro higku it baka bilang panglimpyo ag sunscreen.
Ginasunog nanda ro mga higku ag ginapahid ro anang abo sa andang eawas.
Nagasaeaming ro pamaagi it pagpangabuhi it tribong Mundari sa andang madaeum nga koneksyon sa kalikasan.
Kakaiba man raya para katon, apang para kanda, raya ro andang kultura nga padayun nanda nga gina-preserba ag ginadahanan.
