KALIBO, Aklan–Eubos ro kasubo it sangka tricycle driver matapos nga masunog ro anang tricycle nga nakaparada sa sangka bakanteng lote maeapit sa karsada kaina it aga-aga sa Brgy. Mantiguib, Makato.
Suno kay Leonel Morales, nagapabilin pa sanda nga blangko kung paano nasunog ro anang behikulo apang owa kara ginaduea nga posibilidad nga ginhungod ro insidente.
Haeos tatlong dag-on eon sigon imaw nga nagaparking sa nasambit nga lugar ag raya ro unang beses nga nasunog ro anang tricycle.
Owa man sigon imaw it naging kaaway sa andang lugar rason nga owa imaw it matumod nga posibleng may kahimuan kara.
Ginpahayag dugang nga bag-o pa ro motorsiklo it anang tricycle ag padayun pa raya nga ginahueogan.
Kapin sa P40,000 pa sigon ro anang nabilin nga balanse.
May kaangtanan kara, nagapadayun man ro imbestigasyon it Bureau of Fire Protection (BFP)-Makato angot sa insidente.
Ginpahayag ni FO2 Sandro Fernando, Public Information Officer it BFP-Makato nga padyun ro pagtipon it mga impormasyon it andang arson investigator para matumod ro ginhalinan it kaeayo.
Base sa buoe it CCTV footage maeapit sa lugar, may sangka motorsiklo nga nag-agi antes nagtuhaw ro sunog.
Ginatan-aw pa it mga otoridad kung may kahilabtanan raya sa hitabo.
Sa makaron, ap-at ka mga anggulo ro ginapanan-aw it BFP.
