KALIBO, Aklan — Nagapabilin nga paealigban sa pamilya Agrabio ro pag-eapa sa andang alagang urok sa Brgy. Navitas, Numancia.
Sa interview it Bombo Radyo, ginpahayag ni Delbert Agrabio nga natabu ro pag-atake it indi pa matumod nga sapat sa anang urok, gabi-i it Miyerkules, Agosto 21 sa nasambit nga lugar.
Suno kana nga nakataeana eon kunta nana nga pagabahugan ro anang urok nga nagapang-edaron it daywang buean kat owa eon raya sa anang tangkae.
Sa andang pag-usoy kaibahan ro anang unga, nakit-an nanda ro urok nga patay eon ag haeos katunga eon lang it anang eawas ro nabilin.
Nakibot suno kana imaw sa sitwasyon it anang alaga bangud nga mag-eowas nga owa eon ro kasudlan it sapat hay owa man it nakita nga bakas it mga nagtueo nga dugo sa eugta.
Ginasugid nga matsa ginsuyop ro tanan nga dugo it anang alaga kun sa siin may nakita nga buho sa anang tutunlan.
Maeayo sigon ro andang baeay sa andang tangkae rason nga owa nanda napan-uhan ro natabu.
Raya suno kana ro kauna-unahan nga kahigayunan nga naka-eksperyensya sanda it makarondayang hitabu sa sueod it pilang dag-on nanda nga pag-alaga it baboy.
Matapos sigon nga nagkaeamatay ro anang alagang baboy sa pagpanaeasa it African Swine Fever ko nagtaliwan nga dag-on, ginpahayag ni Agravio nga uman kunta imaw nga makikipagsapalaran sa pag-alaga, apang daywang adlaw pa eamang kana ro nasambit nga urok hay gin-eapa man raya it indi matumod nga sapat.
Mabahoe ro anang pagpati nga kon bukon it mga asong gala ro umatake hay posibleng haeo nga maabu sigon sa andang lugar.
Dugang pa nga kon ayam ro umatake hay posibleng bukon eamang it sambilog kundi ap-at ro nagkaon bangud nga haeos katunga it eawas it urok ro naduea ag imposibleng maubos it sambilog eamang.
Insigida sigon imaw nga nag-report sa outpost it andang barangay tanod agud nga ipaabot ro insidente.
Ro natabu hay nagtuga man it alarma ag pagkabaeaka sa iba pa nandang kasimaryo.
Sa pihak nga parte, panawagan ni Punong Barangay Franny Reyes it Navitas, Numancia sa anang mga pumueuyu nga maging mapagbantay eabi eon ro mga may alagang kasapatan.
Dugang pa nga likawan sigon nga mag-overthink bangud nga nagapadayun pa ro imbestigasyon it natungdan nga ahensiya it gobyerno agud nga matumod kon anong klase it sapat ro umatake.
