KALIBO, Aklan—Sangka most wanted person it Bataraza, Puerto Princesa, Palawan ro natigayon nga naaresto sa mismong kaadlawan nana sa banwa it Altavas.
Ginkilaea ro akusado nga si Allan Barrientos Delos Angeles, 45-anyos, presenting naga istar sa Brgy. Caticlan, Malay.
Imaw hay gin-aresto pinaagi sa gahum it Warrant of Arrest nga ginpirmahan ag ginpaguwa ni Hon. Adelardo S. Escoses it Branch 51, RTC Puerto Princesa sa kasong Illegal Possession of Firearms ag Frustrated Murder.
Si Delos Angeles hay gin-aresto it gintingob nga pwersa it Altavas Municipal Police Station, Bataraza Municipal Police Station, RIU6 Aklan, ag 2nd Aklan Police Mobile Force Company.
Kapin man sa P260,000 pesos ro gintaeana nga pyansa it korte para temporaryong kahilwayan it nasambit nga akusado nga presenteng nakakulong sa nasambit nga taeatapan it pulisya.
Samtang, gintaw-an man it cake it mga otoridad ro akusado matapos masayuran nga kaadlawan nana ko nasambit nga adlaw.
