KALIBO, Aklan — Medyu gin-abswelto ni Punong Barangay Jessie Morales it Libas, Banga ro sangka poultry farm nga ginareklamo ag ginaturo nga ginahalinan it sangkaterbang eangaw nga nagapamerwisyo sa mga pumueuyu sa andang lugar ag sa iba pang kaiping nga kabarangayan sa banwa it Banga.
Suno kay Morales nga raya ro anang naging konklusyon matapos madiskubrehan nga maabu man nga mga residente sa andang lugar ro may manukan bilang kaparte it andang sustainable livelihood program.
Aminado man ro opisyal nga grabe gid man ro pagpanaeasa makaron it eangaw bangud nga season it mga prutas partikular ro mangga, pinya ag iba pa nga gina-abat it mga eangaw .
Angot kara, plano nana nga ipatawag ro pilang mga residente nga may backyard poultry ag piggery agud nga obligahon ro mga raya nga makaangkon it septic tank para sa proper disposal it higku it mga kasapatan .
Dugang pa nga pagahinyu-on ro mga raya nga maggamit it apog agud nga malikawan ro pagbaho ag magbutang it screen agud nga indi maka-eapos ro insekto.
Depensa pa nana nga ro ginareklamo nga poultry farm hay fully airconditioned ag may bueong nga ginagamit agud nga malikawan ro pag-abu it eangaw .
Bangud nga nabudlayan eon nga makatueog ag makakaon ro mga residente, ginpaabot nanda ro reklamo sa social media ag Bombo Kalibo.
Ginpakita man nanda ro kaabuon it eangaw nga nagdukot sa ginbakae nanda nga sticky fly traps.
Nagpanindugan man si kapitan Morales nga pagahueaton nana ro rekomendasyon it anang konseho pinaagi sa igasumiteng committee report.
Mag-eowas sa barangay Libas, ginareklamo man ro sangkaterbang eangaw it mga residente it Tabayon ag Manggan.
