KALIBO, Aklan — Nagdangop sa Bombo Radyo Kalibo ro pamilya Delfin matapos nga mataeupangdan sa likod it andang baeay ro sangkaterbang eupak nga nagakalhit sa sangka puno ag mga kasagingan sa Purok 7, Brgy. Bulwang, Numancia.
Suno kay Gigi Delfin, residente it nasambit nga lugar nga samtang naga-grass cutter ro anang asawa, agahon it Miyerkules hay nakita kara ro sangkaterbang insekto nga makabig nga makahaealit.
Nauna kara, nagpangayo sanda it bulig sa Department of Agriculture agud kunta nga ma-inspection kon anong klase it eupak ro nagapanaeasa maeapit sa andang baeay , apang ginlaygayan eamang sanda nga magbakae it insecticide nga iga-spray sa puno agud nga matapna ro infestation.
Naalarma sigon sanda sa pagkabaeaka nga magsueod sa andang baeay ro eupak nga delikado eabi eon kon magkapyot sa panit nga nagatuga it sobrang katoe ag pagpanghaeok .
Kadungan kara, nag apela sanda sa andang barangay ag iba pang mga natungdan nga maaksyunan ro andang problema .
Ginasugid nga ro mga eupak ukon caterpillar hay nagaguwa kada tag-uean ag pagkatapos it daywa hasta tatlong domingo hay naging moth ukon alibangbang.
