Nagareklamo eon ro mga miyembro it Philippine Hotel Owners Association ag gin-insister nga bayaran eon it Overseas Workers Welfare Administration (OWWA) ro P1.74 bilyon pesos nga utang sa mga hotel nga gingamit it overseas Filipino workers (OFWs) bilang quarantine facilities.
Suno sa tag-ana it mga hotel, kaugaligon nanda nga kwarta ro ginagamit agud nga mapadayun ro operasyon ag maserbisyuhan ro OFWs nga naga-abot.
Sa mga quarantine hotel naga-agto ro mga OFWs bilang pagsunod sa mandu nga may kaangtanan sa COVID-19 protocol.
Hugut nga ginapatuman ro 14-day quarantine sa mga naga-abot nga OFWs agud nga mapugngan ro pagkalhit it virus.
Hasta nga lomobo ro baeayran it OWWA sa mga hotel nga gin-obra nga quarantine accommodation.
Suno man sa OWWA, nagkasugot eon sanda it mga hotel owners nga ginapahaum eon ro bilyong pisong pangbayad sa quarantine hotel.
Magahalin sigon ro bayad sa Department of Budget and Management (DBM).
Suno kay OWWA Administrator Hans Leo Cacdac, iga-release eon sigon sa masunod nga domingo ro bayad sa mga hotel.
Dapat may mabahoe nga budget ro OWWA bangud nga mabahoe ro remittances it OFWs.
Ro OFWs ro nagabuhi sa ekonomiya it nasyon rason nga indi dapat nga pabay-an ro ahensiya nga nagatatap kanda.
