KALIBO, Aklan—Sangkiri eamang ro nagbisita sa isla it Boracay umpisa Setyembre 1 hasta 15.
Base sa datos it Malay Municipal Tourism Office nga kapin sa 57,787 nga turista eamang ro nagbisita sa sikat nga isla sa nasambit nga period ukon may pagnaba it 23,787 kumpara sa 81,574 nga nailista sa kaparehong period ko nagtaliwan nga buean it Agosto.
Nauna eon nga ginpahayag ni Mr. Felix Delos Santos, municipal tourism officer nga kaabuan sa mga turista nga nagbakasyon sa Boracay sa unang katunga it makaron nga buean hay mga domestic tourists nga may 50,697, ginsundan it 5,613 nga dumueuong nga bisita ag 1,477 nga Overseas Filipino Workers (OFWs).
Ginasugid nga raya ro kauna-unahan nga kahigayunan sa nagtaliwan nga mga binuean nga nagnaba ro numero it mga nailistang bisita.
Ginapatihan nga ro pagnaba hay bangud sa uman nga pagbalik sa klase it mga estudyante ag ro eubusan nga pagbalik it iba pang negosyo sa bilog nga nasyon.
Ginpahayag ni Delos Santos nga posibleng sa ulihing quarter it dag-on hay uman nga magataas ro numero it mga turista.
