KALIBO, Aklan–Ginpaathag ni Dr. Philip Ian Padilla, sangka microbiology professor sa University of the Philippines nga posibleng nagalikaw eon ro eawas ni Pope Francis sa antibiotic nga ginabueong kana daea it anang kagueangon ag iba pang factor rason nga nagalala ro kondisyon it Santo Papa.
Ginpaathag dugang ni Dr. Padilla nga maabong factor ro dapat ikonsidera rason nga may resistance eon ro eawas it Santo Papa bangud sa existing eon nana nga problema sa anang baga.
Mag-eowas kara, posible suno kana nga masyado eon nga mahina ro immune system it 88 year old pontiff rason nga imbes nga magmayad hay nagapabilin nga una raya sa kritikal nga kondisyon.
Nasayuran nga si Pope Francis hay prone sa lung infections matapos nga nagdevelop ro pleurisy, sangka inflammation nga nakapalibot sa baga.
Sa anang 12 anyos nga pagpamuno sa Roman Catholic church, maabong beses eon man imaw nga nahospital kapin eon ko March 2023 nga nagpabilin imaw it tatlong adlaw sa hospital bangud sa bronchitis.
