BANGA, Aklan—Sapul sa CCTV camera ro pagsueod ag pagpanakaw it sangka owa nakilaea nga eaeaki sa sangka baraka sa kilid it national highway nga sakop it Brgy. Mambog, Banga bandang ala-1:15 it aga-aga ko nagtaliwan nga Pebrero 21, 2025.
Makita sa CCTV ro paglingling it eaeaki nga nakatabon ro itsura, naka shorts ag t-shirt nga itom sa pwertahan antes nga eubusan nga nagsueod ag nagpang-ukay it mga gamit gamit ro sangka flash light.
Matsa makadali man raya nga nagpanic ag naglingling sa guwa matapos nga makabat it wang-wang it patrol car.
Padayun pa nga gina imbestigahan it Banga Municipal Police Station ro insidente ag sa pagkatawo it suspek.
Sa Facebook post ni Jy-nie Jane Guarino Bantigue, ginapanawagan kara sa tanan nga maging mapagbantay agud nga indi mabiktima it manakaw.
Ginasugid nga ro suspek nga nagsueod sa anang baraka hay nagpaeagyo sakay it anang bike paagto sa Kalibo nga direksyon.
Apela pa nana sa mga may CCTV sa kilid it highway nga may nahagip nga naka bike ag may body bag sa rato nga adlaw ag pang orason nga makabo-oe it kopya sa pag-eaum nga makilaea ro suspek.
