Bukon sigon it sakop it prinsipyo it double jeopardy si Vice President Sara Duterte maskin nga nagapangatubang imaw sa magkaseparado nga impeachment proceedings ag criminal case nga parehong may kaangtanan sa gina-alegar nga pagpamaeag kanday Pangueong Ferdinand Marcos Jr., First Lady Liza Marcos ag dating House Speaker Martin Romualdez.
Suno kay impeachment spokesperson Reginald Tongol, magkaiba ro tuyo it daywang proseso. Ro impeachment court hay sangka constitutional tribunal eamang nga nagatumod sa political accountability ag pagiging nagakabagay sa puwesto, samtang ro regular nga korte ro nagatalakay sa criminal liability.
Ginpahayag man ni Tongol nga klaru sa 1987 Constitution ag sa mga desisyon it Supreme Court nga pwedeng separadong magpadayun ro criminal prosecution ag impeachment proceedings.
Nauna eon nga nag-atubang si Duterte sa Quezon City Regional Trial Court ag nagpiyansa it P360,000 para sa tatlong counts it grave threats matapos magpaguwa it arrest warrant kontra kana. Engkaso nga mapamatud-an nga guilty sa impeachment court, pwede imaw nga mapahalin sa puwesto ag pagabawaean nga magbuyot it anumang pampublikong posisyon.
