KALIBO, Aklan—-Ginsaysay it Department of Trade and Industry ukon DTI-Aklan ro andang bag-ong programa nga sari-sari store advancement program with diskwento caravan agud nga mabuligan ro mga maintok nga mga negosyante eabi eon ro mga tag-ana it sari-sari stores nga mapabaskog ro andang negosyo.
Suno kay Rommel Amihan, provincial director it DTI-Aklan nga pinaagi sa nasambit nga programa hay pagataw-an it online training ro mga interesado nga sari-sari store owners sa bilog nga probinsiya agud nga mabuligan sanda nga mapa-umwad ro andang operasyon ag sa ulihi hay makasaylo sa mas mabahoe pa nga negosyo.
Nagpahaum sigon ro DTI it mga modules nga magaturo sa sari-sari store owners kon paalin nga ma-digitize ro andang operasyon ag mapa-expand ro andang market access.
Dugang pa ni amihan nga pinaagi sa andang diskwento caravan, may ginkangay man sanda nga mga distributors nga nagabaligya it mga basic nga mga produkto agud nga makatau it mas barato nga presyo sa mga negosyante nga andang igabaligya .
Sa pihak nga parte, nagapadayun suno kana ro andang mentoring program sa 10 nga mga benepisyaryo sa probinsiya it aklan sa idaeum it Kapatid Mentor Me-Money, Market, Encounter.
Ro nasambit nga programa hay sangka 10-module mentorship and coaching program nga nagatuyo nga mapabaskog ro Micro and Small Enterprises sa nasyon ag raya hay libre .
Ro mga beneficiary hay ginatur-an kon paalin nga mapadaeagan ro andang napili nga negosyo , paalin nga makipag-angot sa mga potential nga pwedeng maboe-an it pondo ukon kapital ag pag engganyo kanda nga mag-share it andang kasayuarn ag mga istratehiya sa andang mga mentors agud nga mas pang matur-an kon paalin nga mapa-abu ro andang mga customer.
