KALIBO, Aklan–Posibleng sa ikatlo ukon ulihing kwarter it makaron nga dag-on hay magabukas eon ro satellite office it Philippine National Police Anti-Cybercrime Group sa probinsiya it Aklan.
Raya hay igabutang sa sueod it Aklan Police Provincial Office sa Camp Pastor Martelino sa New Buswang Kalibo.
Suno kay P/Cpl. Emeritu Frutas, Jr. it Regional Anti-Cybercrime Unit 6 nga sa kamatuoran hay maga-agto sanda sa Aklan sa masunod nga mga inadlaw agud nga maplantsa ro nasambit nga plano.
Tuyo kara nga matapna ro mga internet crimes ag makasuhan ro mga cyber criminals sa provincial level.
Ro pagtukod it anti-cybercrime unit sa Aklan hay kasunod man it nagatinaas nga internet crimes sa bilog nga nasyon.
Sa pihak nga parte, gindugang pa ni Cpl. Frutas nga agud nga mas pang mapabaskog ro away kontra sa cybercrime, magapatigayon sanda it seminar angot kara kaibahan ro mga kapulisan sa probinsiya.
Gusto sigon nanda nga mabuligan ro pulisya sa pagbuyot it mga makarondaya nga kaso eabi pa ag ro cybercrime ro sambilog sa mga pinaka-eapnaag makaron nga non-violent crimes sa Pilipinas.
Sa mga gustong magpaabot it reklamo, mag-agto eamang sa e-sumbong portal ukon mag-agto sa andang opisina para insigidang maaksyunan ro kaso.
