Makaalarma eon suno kay Kalibo Sangguniang Bayan member Ronald Marte ro nagakinatabo kon sa siin imbolbado sa insidente it pagpamatay ro pila ka mga pulitiko.
Bangud kara, ginakondena sigon nanda ro nasambit nga insidente partikular ro pagpamaril-patay kay Negros Oriental governor Roel Degamo, sa ana nga mga body guard ag iba pang sibilyan bilang opisyal it banwa nga nagaserbisyo eamang it husto sa mga pumueoyo.
Apang, iya sigon sa probinsya it Aklan partikular iya sa banwa it Kalibo hay nagapabilin nga matawhay ro sitwasyon ag kon may politicial rivalry hay insigida nga nagakaayos pagkatapos it election.
Ginpaathag dugang ni Marte nga inde malikawan nga maobrahan it isyu ukon istorya kon una ka sa patag it pulitika apang gilayon raya nga maayos ukon maduea sa oras nga maimbestigahan ag magaguwa ro kamatuoran.
Sa makaron suno sa opisyal hay ginaistoryahan eon nanda ro pagmodernize sa kapulisyahan sa banwa it Kalibo para masiguro ro kaeowasan it kada pumueoyo
