KALIBO, Aklan—Ginakalipay it sangguniang bayan it Kalibo ro pagkapasa sa Provincial Evaluation it Local Legislative Awards it Department of Interior and Local Government ukon DILG.
Suno kay Kalibo vice mayor Cynthia dela Cruz nga nakaangkon sanda it over-all performance rating nga masobra sa 80%.
Bangud kara, ginpasaeamatan nana ro tanan nga miyembro ag staff it SB-Kalibo kamana man ro suporta ni mayor Juris Sucro.
Ro Local Legislative Award hay nagakilaea sa maayos nga performance it sangguniang bayan sa paghimo it mga lehislasyon nga makabulig agud nga makahimo it mga mapuslanon nga local administration ag development para sa kamaeayran ag kinahangeanon it mga pumueuyung kalibonhon.
Suno kana nga nakasabat ro SB Kalibo sa mga criteria para sa judging nga ginaeakipan it pagiging epektibo it legislative agenda ag legislative tracking system, availability it legislative documents ag mayad nga performance it sanggunian.
Gindugang pa it bise alkalde nga ro pagkilaea hay nagapakita eamang nga ro performance it konseho hay nagakasinanto sa katuyuan it administrasyon ni Mayor Sucro.
Magaserbi sigon raya nga motivation kanda agud nga mas pang maghugod sa pagtau it mga innovations ag excellence sa legislative process.
Sa makaron hay maga-umpisa eon man sanda nga magapahaum it mga nagakaigo nga dokumento para sa regional hasta sa national level evaluation para sa 1st class municipality.