KALIBO, Aklan — Plano it Sangguniang Bayan it Kalibo nga i-require ro pamunuan it contractor nga Rotaflex Construction Development Corporation ag Municipal Engineering Office nga magsumite it progress report sa nagapadayun nga construction it bag-ong Kalibo public market.
Raya ro ginpahayag ni SB member Ronald Marte kasunod it owa pagsipot it contractor sa ikaywang kahigayunan sa ginpatawag nga committee hearing as a whole ko nagtaliwan nga Oktubre 23.
Ginsuhestiyon sigon nanda nga uman nga padaehan it sueat ro contractor ag patambungon sa hearing sa ikatlong kahigayunan agud nga masayuran mismo kanda base sa andang records ro update sa owa pa natapos nga proyekto nga dapat kunta hay natapos eon ko Agosto 31, 2025.
Ginpahayag dugang nga kaibahan pa sa andang plano hay magpatigayon it site inspection sa lugar.
Tuyo sigon kara nga mataw-an it sabat ro mga pangutana it mga vendors ag mga pumueuyu angot sa presenteng kahimtangan kara ag kon hin-uno raya target nga matapos.
Dugang pa ni SB Marte nga kinahangean nga maskin nga ginadalian ro proyekto hay dapat nga masiguro nga polido ro trabaho para sa seguridad it tanan bangud sa naeksperyensiyahan makaron nga mga linog sa nasyon.
Gusto it konseho nga mataw-an it kaklaruhan ro proyekto nga may P300 million nga budget para kara halin sa government loan.
Suno pa sa opisyal nga nakipagdiskusyon man imaw sa engineering office sa andang pag-insister nga 60% eon nga tapos ro proyekto apang sa anang tan-aw hay 50% pa eamang ro anang nakitang progreso.
