Kalibo Aklan —— Magapatigayon it emergency meeting nga makarun nga adlaw ro Sangguniang Bayan it Kalibo.
Suno kay Kalibo Mayor Emerson Lachica, raya hay kasunod it ginpirmahan ag ginpaguwa ni Aklan Governor Florencio Miraflores nga Executive Order No. 20 series of 2020 kon sa siin ginpaidaeom sa Enhance Community Quarantine ro bilog nga probinsya it Aklan agud nga mapabiling eowas sa 2019 coronavirus disease ukon COVID-19 pandemic ro probinsya.
May kaangtanan kara, umpisa makaron nga adlaw hay alas-8:00 it gabie hasta alas-5:00 it agahon ro curfew nga igapatuman sa banwa it Kalibo halin sa oras nga alas-9:00 it gabie hasta alas-5:00 it agahon.
Samtang, ginklaro ni Mayor Lachica nga uwa it matabo nga pagpasarado sa Kalibo public market, grocery stores, supermarkets ag iba pa rason nga uwa it dapat kabaeak-an ro mga pumueoyo.
Raya hay kasunod it pag panic buying it mga pumueoyo bangud sa saea nga impormasyon.
Suno pa kay Mayor Lachica, bastante ro stock nga bugas sa probinsya it Aklan kon sa siin magasustiner sigon raya it hasta sa ap-at nga buean.
Samtang, magapanupod it home quarantine pass ro tagsa ka barangay agud nga maminimize ro pagguwa it mga pumueoyo.
Sa pihak kara, nag-apela si Mayor Lachica sa mga pumueoyo nga magsunod sa ginapatuman nga laye ag ipairal ro disiplina sa kaugalingon agud nga malikawan ro COVID-19.
