KALIBO, Aklan—Plano makaron it Sangguniang Bayan it Kalibo nga magdihon it resolusyon nga nagahinyu kay Department of Interior and Local Government (DILG) secretary Eduardo Año nga pasugtan sa gihapon ro mga tricycle nga mag-agi sa mga main road sa pihak it nakataeana nga implementasyon it “highway ban” para sa mga tricycle.
Suno kay SB member Augusto Tolentino nga ginahinyu nanda nga gamiton it mga tricycle drivers ro national highway, apang sa right side maga-agi ag indi magpatunga.
Raya hay samtang nga owa pa it alternatibong daean sa Kalibo.
Nasayuran nga base sa DILG Memorandum Circulars No. 2011-68 ag 2007-07, ginabawaean ro mga tricycles sa national highways nga ginagamit it mga mabahoe ag madasig nga mga saeakyan kapareho it mga trucks ag mga bus nga peligroso kanda engkaso nga makaangkon it aksidente.
Apang ro tricycle ro nagapangunang means of transportation sa 16 nga barangay sa banwa it Kalibo.
Kaabuan sa mga raya hay padayun nga nagagamit it fast lane sa baylo nga sa right lane para sa slow-moving vehicles.
