KALIBO, Aklan–Kumpiyansa ro Sangguniang Bayan it Malay nga pagasuportahan it manaba nga kapueungan it Kongreso ro ginaproponer nga pag-convert sa banwa it Malay nga maging component city.
Raya ro ginpahayag ni SB member Vicky Aguirre kasunod it andang pagbisita sa Kongreso.
Suno kana nga nasorpresa sanda sa ginpakita nga suporta ni House Speaker Martin Romualdez sa nasambit nga tikang.
Madumduman nga nagdihon si 2nd district Rep. Ted Haresco Jr. sa 19th Congress it Resolution No. 2023-069 nga naga endorso sa pag-convert sa banwa it malay nga maging component city nga pagakilaeahon bilang City of Malay engkaso nga maging laye.
Nasayuran nga mag-eowas sa pagbisita sa kongreso, nag agto man sanda sa baliuag city sa bulacan bilang bag-ong tukod nga siyudad ag sa Valenzuela city agud nga mag-observe sa andang mga best practices nga pwedeng ma-apply sa oras nga mataw-an it katumanan ro handum nga cityhood it Malay.
Kaibahan it SB members si Malay mayor Frolibar Bautista kamana man ro mga department heads it LGU-Malay ag pilang opisyal it Department of Education.
Ginpasiguro ni Aguirre nga haum eon sanda para sa nasambit nga tikang agud nga mapabilin ro development ag makatau it basic socio-economic services kapareho it pagkaon,edukasyon , health care, peace and order ag iba pa.
Sa pihak nga parte, haeos nakasunod man suno kana ro malay sa tatlong mga requirements nga ginapangayo mag-eowas sa population.
Apang mabahoe nga factor sigon nga ginataw-an it konsiderasyon ro land area ag income.
Ro Malay hay makabig nga 1st class municipality nga may hurisdiksyon sa isla it Boracay nga may mabahoe nga kontribusyon sa income it probinsiya.
