Dismayado si Sangguniang Bayan Member Ronald Marte sa mga batikos online angot sa planong pagsueod it Polaris Transport and Logistics Incorporated, sangka e-trike company sa Kalibo.
Suno kay Marte, owa pa it pinal nga desisyon ro Sangguniang Bayan sa proposisyon ag ginahueat pa ro resulta it committee hearing. Ginklaru man nana nga bukon it tuyo it plano nga duea-on ro mga tradisyunal nga tricycle ag owa man kara it pagakitaon ro lokal nga gobyerno halin kara.
Kaparte it proposisyon ro rent-to-own scheme para sa mga e-trike, kun sa siin nakadepende sa mga TODA ag andang mga miyembro kun gusto nanda nga magbo-oe it unit.
May suhestiyon man nga ruta nga magakonekta sa mga nagapangunang lugar kapareho it plaza, kapitolyo ag mga eskwelahan.
Nauna kara, nagbisita ro mga opisyal it Kalibo sa Roxas City agud nga tan-awon ro operasyon it nasambit nga e-trike, nga may kapasidad nga hasta sa 10 nga pasahero, kumpara sa tradisyunal nga tricycle nga kaeabanan nga hasta sa an-um nga pasahero ro pwedeng maisakay.
Samtang, ginpahayag pa ni SB Marte nga kinahangean sa gihapon nga himuon ro komprehensibong konsultasyon kaibahan ro mga TODA, LTO, Traffic Management and Transportation Division ukon TTMD ag PNP bago makaangkon it pinal nga desisyon sa nasambit nga proposisyon.
