Kalibo Aklan —–Kadungan it selebrasyon it araw ng kalayaan sa biyernes, Hunyo 12, magapatawag it press conference ro mga konsehal it banwa it New Washington sa public plaza it nasambit nga banwa .
Suno kay Sangguniang Bayan Member Junie Repiano nga tuyo kara nga maklaru nga owa it kamatuoran ro mga ginpasaka nga kaso kanda it kaibahan nga si SB member Roly Equiña Jr. matapos nga raya hay ginbasura it committee on rules it Sangguniang Panlalawigan .
Nasayuran nga ko Mayo 8, 2020 hay nagpasaka si SB Equina it administrative complaint kontra kanday Vice Mayor Kristian Peralta ag 9 nga iba pang konsehal bangud sa ginasugid nga pag-eabag sa Local Government Code of 1991.
Gin-akusahan sanda ni Equiña it conduct unbecoming, dishonesty, oppression, misconduct in office, gross negligence ukon gross dereliction of duty ag betrayal of public trust.
Nag-ugat ro isyu sa gina-alegar nga kawad-an it hurisdiksyon ag owa gintaw-an it procedural due process it anang mga kaibahan si Equiña kat insigidang gin-aprubahan ro imbestigasyon it ethics committee it konseho.
Ginklaru man nana nga bukon it imbestigasyon ro andang ginhimo kundi nga fact finding inquiry agud nga matumod kon ham-an nga nadaeahig ro pangaean ni equiña ag ni Ronald Gumboc sa isyu it fake news .
Madumduman nga nadaeahig ro pangaean it opisyal sa gina-alegar nga “fake news” ko buean it Abril sa kasagsagan it pagpanaeasa it COVID-19 pandemic sa nasyon matapos nga ginasugid nga nag-inquire imaw sa Municipal Health Office it banwa angot sa magueang nga pasyente halin sa Barangay Pinamuk-an nga naka-confine sa sangka pribadong ospital sa Kalibo nga ginasugid nga PUI .
Gusto ni Equiña nga mapatalsik sa pwesto ro anang mga kaibahan nga konsehal ag ro andang bise alkalde .
Ginpahayag pa ni Repiano nga base sa findings it Provincial Board, ginhimo nanda ro nagakaigo nga proseso .
Samtang, ginpasiguro man kara nga hugut nanda nga pagasundon ro social distancing sa igapatawag nga presscon.
Nagapabilin man suno kana nga COVID positive free ro banwa ag hugut nga ginabantayan ro andang mga returning OFWs ag locally stranded individuals sa andang gintaeana nga ligtas COVID center agud nga malikawan ro local transmission it sakit .
