KALIBO, Aklan–Temporaryong gin-lockdown ro sangguniang bayan session hall it munisipyo it Tangalan matapos nga mag positibo sa COVID 19 ro sambilog nanda nga staff.
Mag-eowas kara, ginahueat pa ro resulta it swab test it tatlong iba pa nanda nga empleyado.
Suno kay Tangalan vice mayor Gene Fuentes nga insigida sanda nga nagdesisyon nga suspendihon ro operasyon ko Lunes, Hunyo 21 agud nga matapna ro mas pang pagkalhit it virus.
Insigida sigon nga ginpaidaeum sa disinfection ro andang session hall ag ginpa-isolate ro mga nakaangkon it close contact sa pasyente.
Ro mga may transaksyon suno kana hay pwedeng makatawag ukon mag-text sa anang telepono.
Samtang, ginpahayag pa ni vice mayor Fuentes nga engkaso nga magguwa ro resulta ag negatibo ro tatlong empleyado sa COVID 19 hay insigidang magabalik ro andang operasyon.
Nasayuran nga ko Lunes pa it nagtaliwan nga domingo gin abisuhan ro mga nasambit nga empleyado nga mag isolate agud nga kon mag positibo man hay owa eon it abu nga staff ro maapektuhan.
Sa pihak nga parte, ginpahayag dugang ni vice mayor Fuentes nga mismong ro mga vendors it andang merkado publiko ro nagdesisyon nga isarado ro tunga nga portion it tindahan kun sa siin nahamtang ro andang fish, meat ag vegetable section matapos nga sangka vendor ro nagpositibo.
Ginpaidaeum sigon ro lugar sa maid-id nga disinfection ag mataw-an it daean ro contract tracing.
Bukas man sigon ro mga grocery stores sa kilid it tindahan.
Kaeabanan sigon nga baligya it mga apektadong vendors hay ginabaligya online.
Sa makaron ro Tangalan hay may 62 nga COVID-19 cases, kun sa siin 32 kara ro aktibong kaso ag 1 ro namatay.
Apang ginahueat pa ro resulta it RT PCR test sa daywa nanda nga residente nga namatay ko nagtaliwan nga adlaw nga puro mga senior citizens.
