KALIBO, Aklan — Sangka resolusyon ro gindihon ni Sangguniang Bayan member Augusto Tolentino angot sa ginaproponer nga pagbilog it purok organization sa bilog nga banwa it Kalibo.
Suno kana nga tuyo kara nga mapabaskog ro volunteerism sa mga pumueuyu para sa kamaeayran it andang purok.
Ginasueong man sigon kara ro pag-organize it purok leader, assistant purok leader ag treasurer.
Dati eon sigon raya nga napatuman sa kada purok it C. Laserna St. Kalibo kat imaw pa ro nagapungko nga punong barangay it Poblacion kun sa siin pinaagi sa pagbueuligan it mga pumueuyu hay nakaangkon it maayos ag maligwa nga pathways ag nabutangan it mga street lights ro mga daeanon .
Ro mga purok leaders man sigon ro nagapaabot it mga problema ag kinahangeanon it andang mga pumueuyu eabi eon kon may kalamidad sa barangay ag munisipyo.
Obligasyon man it purok organization kon paalin nga mapabilin ro peace and order, kalimpyo ag development it andang lugar.
Ro nasambit sigon nga ideya hay gin-adopt man it iba pang barangay sa banwa it Kalibo.
