NEWS Analysis– Owa nababawasan kundi naga inabu pa ro “scalawags” sa Philippine National Police (PNP).
Owa eon nagaduha-duha sa pag obra it maeain ro mga pulis nga nagiging rason agud nga mas pang bumagsak ro imahe it PNP.
May mga pulis pa man nga tadlong nga daean ro gina agihan apang sa mga nagakatabu makaron nga waea-tuo ro ginakaeakutan it mga pulis, mahuyap eon lang sa tudlo ro mga matino.
Kapareho it pitong pulis sa Angeles City Police Station 2 nga gin-akusahan it pagpangikil sa 13 nga preso.
Mag-eowas sa pagpangikil, gin-akusahan man it illegal nga pag-aresto ag detention ro pitong pulis.
Sa report ni IMEG director Brig. Gen. Warren De Leon kay PNP chief Gen. Benjamin Acorda, Jr., nakabaton sanda it impormasyon nga may mga gin-aresto ag ginkulong sa Police Station 2 ag ginapangayuan it kwarta it mga pulis.
Owa man it kasong ginpasaka.
Ginapangayuan sigon it mga pulis it P30,000 pesos romga naaresto kabaylo it indi pagpasaka it kasong may kaangtanan sa droga.
Gindaea eon sa Camp Crame ro mga pulis para pasakaan it kaso.
Padayun sa pag-obra it violation ro mga pulis.
Kat magpungko si General Acorda ko nagtaliwan nga Abril, nagpromisa imaw nga magapatigayon it internal cleansing sa PNP.
Ginpaandaman nana ro mga “scalawags” eabi eon ro mga naeakot sa illegal drugs nga magapanabat sa laye.
Ro promisa ni Acorda hay ginasubaybayan it mga pumueuyu.
Maabu eon nga PNP chief ro nagpromisa apang owa it penalidad.
Sa baylo nga mabawasan ro mga “bugok” nadugangan pa ag naga-alingasaw sa baho nga nagdugang sa higku it pambansang pulisya.
Hin-uno makaangkon it pagbag-o.
Hin-uno maubos ro “scalawags” sa PNP?