Kalibo Aklan ——Ginaimbestigahan eon sa makaron it Department of Environment and Natural Resources (DENR) ag Bureau of Fisheries and Aquatic Resources (BFAR) kon siin naghalin ro masobra sang libong scallop shells nga nagkalhit sa binit it baybayon sa Station 1 Barangay Balabag sa Isla it Boracay.
Suno kay Haron Deo Vargas, sangka marine biologist it City Environment and Natural Resources Office it Boracay, posibleng may nagpamuoe it scallops ag matapos nga ginbuoe ro ana nga sueod hay ginpilak eon lang sa bibi it dagat ro mga shells ag gin-aywanan.
Sambilog pa sigon nga posibilidad hay ro dueoeongan nga pagkamatay sa idaeom it dagat it mga scallops ag samtang una sa decomposition stage hay ginkaon it mga isda ro sueod kara rason nga nag-eotaw ro mga shells ag gindagsa it humbak sa front beach.
Ginpahayag dugang nga raya ro unang kahigayunan nga may nakit-ang scallop shells nga nagkalhit sa baybayon it Boracay apang uwa it dapat nga ikabaeaka ro mga pumueoyo.
Dugang pa ni Vargas nga gin-umpisahan eon nga boe-on ro mga patay nga kutiba agud malikawan nga maninahan ro mga naga-agi sa lugar kon sa siin ro pila sa mga raya hay plano nga obrahon nga decorations ag designs it mga residente agud may pagkasakuan samtang una sa General Community Quarantine ro bilog nga probinsya it Aklan.
