Medyu makaron pa eamang hay may nakikita eon nga manami nga resulta ro ginpatigayon nga implementasyon it SIM Card Registration Law.
Maskin ro Department of Information and Communications Technology (DICT), kumpiyansang magiging epektibo ro nasambit nga laye agud nga masuk-ean ro mga text scam ag mga pagpangloko ag pagpamentaha gamit ro text messages.
Batyag eon sigon makaron ro mahina nga pagbaligya it SIM cards sa merkado.
Nabatyagan raya matapos umpisahan ro pagpa-rehistro sa mga SIM cards ag ro bag-ong magabakae it SIM, awtomatiko eagi nga gina-rehistro kun sin-o ro magabakae.
Buot hambaeon nga owa eon it eusot .
Posibleng indi man eubusan nga matapna ro mga modus gamit ro SIM cards, apang klaru nga mabawasan kara hasta nga eubusan nga matak-an ro mga nagahana nga scammers nga mahimo ro andang modus operandi.
Kun dati sangkaterba ro ginabaligya nga SIM sa kun siin-siin sa baratong kantidad, nagabaha sa merkado, rason nga ro mga scammer maskin pila hay pagusto it bakae.
Owa it kontrol ag indi masayuran kon sin-o ro magagamit.
Posibleng raya hay sambilog man nga rason kon ham-an nga naging eapnaag ro mga scam pinaagi sa text.
Sangka gamitan eamang ag kon makapang biktima hay ginapilak dayun.
Mas ginaeauman pa nga magabagsak ro pagbaligya it SIM kon matapos eon ro registration.
Disyembre 27, gin-umpisahan ro pagpa-rehistro it SIM card ag magabuhay hasta sa abril sa sueod it 180 days nga gintau sa mga subscribers.
Kon indi mapa-rehistro ro SIM pag-abot it gintaeana nga deadline, awtomatiko eon raya nga ma-deactivate ukon indi eon magamit.
Umpisa nga ginkasa raya ko Disyembre, masobra eon sa 24 milyon ro nakapagparehistro it andang SIM.
Ro mabahoe nga numero it tempranong pagsabat kara it kaabuan it mga pumueuyu hay nagapakita eamang nga maabu ro pabor sa nasambit nga laye.
