KALIBO, Aklan—Ginpakigbahin it sangka manugturo ro anang mga naging accomplishment para ma-qualify bilang sambilog sa regional winners it Dangal ng Bayan Awards it Civil Service Commission (CSC).
Suno kay Mr. Mark Daroy, School Principal it Tangalan Elementary School nga kaeabanan sa anang accomplishment hay nag-umpisa kat magturo imaw sa sueod it haeos tatlong dag-on sa Vivo Integrated School.
Pila sigon sa anang mga hinimuan nga may mabahoe nga kontribusyon sa komunidad hay ro potable water source, concrete perimeter fence, stairway nga nagakonekta sa elementary ag sekondarya ag maabu nga iba pa.
Malipayon sigon imaw matapos nga mapilian it andang district supervisor nga maging nominado sa nasambit nga pagpasidungog.
Ginpahayag dugang nga grabe ro anang nabatyagan nga kaeuoy ag pag-ulikid sa eskwelahan matapos nga makita ro dating sitwasyon kara.//Raya sigon ro nagtao kana it motibasyon para iduso ro mga proyekto ag programa nga makabulig sa mga estudyante, kaparehong manugturo ag mga tawo nga maeapit sa lugar.
