SPORTS News —- Gindayaw ni Pangueong Rodrigo Duterte ro mga atletang Filipino ag mga coaches nga nagpasakop sa 31st Southeast Asian (SEA) Games sa Hanoi, Vietnam umpisa Mayo 12 hasta 23.
Sa naging diskurso it Pangueo sa Rizal Hall, Malakanyang, ginpasaeamatan kara ro mga atleta ag coaches bangud sa “good job” ukon gindaea nga “pride and honor” sa nasyon.
Suno kana nga daeayawon ro mga atletang Filipino para sa andang kahugod sa pagpahaum ag dedikasyon agud nga mapataas ro regional sports competition.
Naangkon it Pilipinas ro pang-ap-at nga puwesto sa medal race kun sa siin 11 nga nasyon ro nagpasakop matapos nga mabo-oe ro kabilugan nga 226 medals sa 31st SEA Games.
Sa nasambit nga numero, 52 ro gold, 70 ro silver ag 105 ro bronze medals nga gin-uli it mga atletang Filipino.
Eubus man nga ginkalipay it Pangueo ro “record-breaking feats” it mga Filipino medalists ag athletes.
Ginpamatud-an eamang sigon it mga atleta nga ro limitasyon sa pagsanay bangud sa Covid-19 pandemic hay bukon it sabeag agud nga maipakita ro andang gina-angkon nga talento ag itau ro tanan nga masarangan.
Sa nasambit nga event, gintaw-an man it award it Pangueo ro mga atleta ag may kaibahan nga cash bonanza.
Sa idaeum it Republic Act 10699 ro cash incentives nga nagabalor it P300,000; P150,000, ag P60,000 hay gintau para sa mga SEA Games’ gold, silver, and bronze medalists.
Mag-eowas kara, gintaw-an man ni Pangueong Duterte it Order of Lapu-Lapu with the Rank of Kamagi ro mga SEA Games medalists.
Samtang, ginkilaea man it Punong Ehekutibo ro importanteng papel ag obligasyon it Philippine Sports Commission (PSC) ag mga coaches sa naging kadaeag-an it mga atletang Filipino sa 31st SEA Games.
