KALIBO, Aklan—Nakataeana nga umabot makaron nga adlaw it dominggo sa isla it Boracay ro Seabourn Sojourn cruise ship.
Suno kay Nieven Maquirang, officer-in-charge of the Port Cruise Ship Operation and Special Project, ro nasambit nga cruise ship hay may sakay nga kapn sa 800 nga mga pasahero nga ginakaeakipan it mga guest ag crew members.
Ro foreign cruise ship hay naghalin sa Auckland, New Zealand ko February 10 kon sa siin nakaadto eon raya sa Australia, Timor-Leste, Indonesia ag makaron nga adlaw hay nag-eayag paadto sa Boracay.
Ginpahayag dugang ni Maquirang nga posibleng magapanaog ro mga bisita ag magalibot sa tanyag nga isla.
Pagasug-aeawon ro mga raya it ati-atihan tribe ag una man mismo ro mga staff it Malay Tourism Office ag maging ro opisyal it lokal nga gobyerno it Malay.
Kaparehas sa nakaangdan, may mga mapig-od nga programa nga igapatigayon bilang pagkilaea sa andang pagbisita.
Nauna eon nga ginpahayag ni Maquirang, nga raya ro resulta sa pagtinguha it lokal nga gobyerno it Malay, stakeholders ag iba pang natungdan nga ahensya it gobyerno nga ma-showcase ro Boracay bilang sambilog sa mga nagapangunang destinasyon it mga nagaeayag nga cruise ship.
Madumduman nga ko ulihing dominggo it buean it Pebrero hay nagbisita ro MV Norwegian Jewel sakay ro kapin sa 2,700 ka mga pasahero.
Ginsundan it MV Westerdam nga kapin sa 1,900 nga mga pasahero man ro daea.
Sakay it daywang ka cruise ship ro mga European, American ag Asian tourist kon sa siin nakitaan ro mga raya it manami nga expression sa andang pag-abot sa Boracay.
