Kalibo Aklan ———Ikaywang adlaw eon makaron it nagapadayun nga search and rescue operation sa naduea nga siyam nga dag-on nga ungang babaye nga nahueog sa estaka ag inanod it nagaragasa nga tubi sa Aklan river sa C. Laserna St. Kalibo.
Suno kay Kim Melgarejo, team leader it rescue team it MDRRMO-Kalibo nga samtang indi makita ro eawas it unga hay magapadayun ro andang operasyon .
Natabu ro insidente pasado alas-4 it kahapon it hapon, kun sa siin naboe-an it CCTV footage ro pagkahueog it biktimang si Kyla Rome , residente it nasambit nga lugar .
Nasayuran nga nadanlog ro unga sa estaka matapos nga ginhana sigon nga abuton ro anang nahueog nga tsinelas hasta nga inanod raya it mabaskog nga sueog it tubi.
Kadungan kara, nag apela si Melgarejo sa mga residente sa kaiping nga mga Barangay nga maeapit sa kasubaan nga kon may mapan-uhan nga gindagsa nga eawas it unga hay insigidang ipahisayod kanda ukon sa kapulisan ag iba pang natungdan nga ahensiya it gobyerno.
