Kalibo, Aklan-Padayun gihapon ro search and rescue operation it Philippine Coast Guard (PCG) sa pitong pasahero halin sa kumueob, nga motorbanca sa katung-anan it Caluya Antique ag Isla it Boracay.
Ro MBCa Ure Mae ag sambilog pang motorbanca hay naghalin it Boracay nga may sakay nga 20 tanan nga mga indibidwal ag pabalik eon kunta it Caluya, Antique ko aga-aga it Lunes, Àgosto 26.
Gin-arkila nanda ro mga baroto nga ginagamit sa pagpangisda agud nga mag outing sa boracay. Sa katung-anan sigon it andang biyahe, nakasumaeang it mabaskog ag mabahoe nga humbak nga naging rason it pagkumueob it mga raya.
Nagpaeutaw-eutaw ro pilang pasahero kun sa siin daywa kara ro nakaeangoy partikular ro boat captain ag sangka crew paagto kunta sa baybayon it caluya apang bangud sa mabaskog nga humbak hay naadto sanda sa San Jose, Romblon nga insigidang nakapangayo it bulig.
Madasig man nga rumesponde ro mga rescuers ag nasalbar it PCG ag mga tawuhan it San Jose MDRRMO ro 10 nga pasahero. Sa makaron hay nagapabilin nga tatlo ro namatay samtang pito nga iba pa ro owa nakita .
Nag apela ro PCG sa mga saeakyang pandagat ag mga naga-istar sa coastal barangay nga insigidang ireport kanda engkaso nga may nakitang mga pasahero it kumueob nga baroto.
Sa pihak nga parte, kalipay ro nabatyagan it 9 nga mga survivors, matapos nga ginsueang eon sanda kaina it agahon it PCG sa Romblon sakay it BRP Kalanggaman paagto sa Caluya.
Madumduman nga ginsueang eon it anang pamilya kahapon it huwebes, ro sambilog sa mga raya nga si arnel belleca nga taga-bicol.
