KALIBO, Aklan—Nagapadayun ro search and retrieval operations it mga katapo it Kalibo Police Station, Municipal Disaster Risk Reduction and Management Office ukon MDRRMO-Kalibo ag mga miyembro it pamilya agud nga mausoy ro sangka eaeaki matapos nga gina-alegar nga nag-eumpat raya sa tulay pasado alas-10:00 kabi-i sa aklan river nga sakop it Purok 4, C. Laserna St., Kalibo.
Nakilaea ro biktima nga si Rod Relator, sa legal nga edad, may asawa , nagatrabaho bilang maintenance sa sangka pribadong eskwelahan ag residente it Brgy. Bakhaw Sur, Kalibo.
Base sa report, nakaangkon sanda it owa pagka-ilintindihan it anang magueang nga si allan relator matapos nga gina-alegar nga gin-barter kara ro anang tatlong alagang manok nga ginaeakipan it daywang ka munga ag sambilog nga dirasa.
Bangud kara, nag-agto raya sa anang barkadang si Jeoffrey Valencia, 28-anyos, residente it nasambit nga lugar ag nakipag-inuman.
Apang matapos sigon nga mahilong hay nag-eumpat raya sa tulay.
Gintinguhaan pa sigon raya nga salbaron it anang mga kainuman apang owa eon raya nakabutwa sa tubi bangud sa mataas ag mabaskog nga sueog tuga it pag-uean-uean.
Samtang, naging negatibo man ro pag-responde it mga otoridad sa brgy. bakhaw norte matapos nga mag-report ro pilang residente nga gina-alegar nga may sangka bangkay nga nag-sab-eay sa lambat it mangingisda.
