KALIBO, Aklan — Igalunsar sa Oktubre 28 it lokal nga gobyerno it Kalibo ro ginpabaskog nga “Search for the Cleanest and Greenest Barangay” nga nakatutok sa tamang pagtatap it mga basura sa 3rd floor it Kalibo Municipal Building.
Suno kay Ms. Adorada Reynaldo, head it Solid Waste Managenent Services it LGU-Kalibo nga sa nasambit man nga petsa igapanupod ro guidelines ag mechanics sa mga punong barangay.
Raya sigon hay naka-pattern sa programa it Environmental Management Bureau ukon EMB nga nagatuyo nga mapatuman ro nakabaehag sa RA 9003 ukon Ecological Solid Waste Management Program.
Sa nasambit nga contest, pagakilaeahon ag pagapasidunggan ro mga barangay nga nag-madinaeag-un sa pag-implementar it nasambit nga kasuguan , kun sa siin , pagahimuon raya nga modelo it ibang barangay.
Ro magadaog sigon sa contest hay igasukoe sa provincial hasta sa national level .
Gindugang pa ni Reynaldo nga ro criteria kara hay ro implementasyon it segregation sa mga panimaeay, compliance sa segregated collection, operasyon it materials recovery facilities ag active barangay committee for ecological solid waste management.
Nakataeana sa katapusan it domingo it Pebrero 2020 ro pag-sumite it mga entry forms ag reports it barangay council sa search secretariat.
Sa Marso 2020 pagahimuon ro unang validation it search committee ag sa Hunyo 12, 2020 ro pag-award sa mga magadaog nga barangay.
Nagpaandam man si Reynaldo nga ro mga barangay nga indi magpasakop sa contest hay posibleng makasuhan sa Ombudsman.
May nakataeana sigon nga cash prize para sa mga magadaog sa cleanest and greenest barangay.
